இலங்கை விமானம் 6½ மணிநேரம் தாமதம்: பயணிகள் தவிப்பு

அந்தமானில் இருந்து சென்னை வர வேண்டிய விமானம் தாமதம் ஆனதால் 6½ மணிநேரம் பயணிகள் அவதிப்பட்டனர்.

இலங்கை விமானம்
சென்னை மீனம்பாக்கம் உள்நாட்டு விமான நிலையத்தில் இருந்து அதிகாலை 5:05 மணிக்கு அந்தமானுக்கு விமானம் செல்லும். மீண்டும் அந்த விமானம் காலை 10.20 மணிக்கு சென்னை வந்தடையும்.

பின்பு, பகல் 12 மணிக்கு கொழும்புக்கு பன்னாட்டு விமானமாக செல்லும். இந்நிலையில், அந்தமானுக்கு சென்ற விமானத்தில் இயந்திர கோளாறு ஏற்பட்டுள்ளது.

இதனால், சென்னைக்கு புறப்பட வேண்டிய விமானம் நிறுத்தி வைக்கப்பட்டிருந்தது. இதனால், அந்தமானில் இருந்து சென்னைக்கு வர இருந்த 148 பயணிகளும் அங்கு சிக்கி தவித்தனர்.

பயணிகள் தவிப்பு
மேலும், சென்னையிலிருந்து இலங்கைக்கு செல்லவிருந்த 156 பயணிகள் சென்னை விமான நிலையத்தில் காத்திருந்தனர். அவர்களுக்கு விமானம் தாமதம் என அறிவிக்கப்பட்டது.

இதனால், கோபமடைந்த பயணிகள் அதிகாரிகளுடன் வாக்குவாதம் செய்தனர். இந்நிலையில், மாற்று விமானம் ஏற்பாடு செய்து மாலை 6.30 மணிக்கு இலங்கைக்கு விமானம் புறப்பட்டு சென்றது. விமானம் தாமதம் ஆனதால் 6½ மணிநேரம் பயணிகள் அவதிப்பட்டனர்.