மத்திய வங்கயின் சுற்றறிக்கையின் படி செயற்படாத நிறுவனங்களுக்கு கடுமையான நடவடிக்கை

வங்கி வட்டி வீதத்தை குறைத்து மத்திய வங்கி வெளியிட்டுள்ள சுற்றறிக்கையின் பிரகாரம் வங்கி வட்டி வீதத்தை இதுவரை குறைக்காத வர்த்தக வங்கிகள் மற்றும் நிதி நிறுவனங்கள் தொடர்பில் மத்திய வங்கி அவதானம் செலுத்தும் என நிதி இராஜாங்க அமைச்சர் ரஞ்சித் சியம்பலாபிட்டிய தெரிவித்துள்ளார்.

அவிசாவளை பிரதேசத்தில் நேற்று(23) இடம்பெற்ற நிகழ்வொன்றின் பின்னர் ஊடகங்களுக்கு கருத்து தெரிவிக்கும் போதே அவர் மேற்கண்டவாறு தெரிவித்தார்.

கடந்த காலங்களில் வங்கி வட்டி விகிதங்கள் அதிகமாக இருந்தபோது பெறப்பட்ட நீண்ட கால வைப்புத்தொகைக்கான வட்டியை செலுத்துவதில் வணிக வங்கிகளும் சில சிக்கல் நிலைமைகளை எதிர்கொள்ள வேண்டியிருந்தாலும், வணிக வங்கிகள் மத்திய வங்கியினால் வெளியிடப்பட்ட வங்கி வட்டி விகிதங்களுக்கு ஏற்ப செயல்பட வேண்டும் எனவும் அமைச்சர் வலியுறுத்தியுள்ளார்.

கடுமையான விசாரணை
எவ்வாறாயினும், மக்களின் அவல நிலையைக் கருத்தில் கொண்டு இந்த வங்கி வட்டி வீதத்தை மத்திய வங்கி குறைத்துள்ளதால், அனைத்து அரச மற்றும் தனியார் வர்த்தக வங்கிகள் மற்றும் நிதி நிறுவனங்களும் சுற்றறிக்கைக்கு அமைவாக செயற்பட வேண்டும் என்பதே அரசாங்கத்தின் நிலைப்பாடாகும்.

இந்நிலையில் வங்கி வட்டி விகிதத்தை உடனடியாக குறைக்கவிட்டால் கடுமையான மற்றும் நேரடியான விசாரணைகள் நடத்தப்படும் என்று அமைச்சர் குறிப்பிட்டுள்ளார்.