அழியாப் புகழைக் கொண்ட சிகிரியா; அழிந்து வருவதாக தகவல்

சுற்றுலாப் பயணிகள் அதிகரிப்பதால் சீகிரியாவில் பாதுகாக்கப்பட்டுள்ள பழங்காலச் சுவர்களில் 70 சதவீதமானவை அழிந்துவிட்டதாக மத்திய கலாசார நிதியம் தெரிவித்துள்ளது.

சிகிரியா
சிகிரியா இலங்கையின் மிகவும் மதிப்புமிக்க வரலாற்று நினைவுச்சின்னங்களில் ஒன்றாகும்.

உலகின் எட்டாவது அதிசயம் என உள்ளூர் மக்களால் குறிப்பிடப்படும் இந்த பழமையான அரண்மனை மற்றும் கோட்டை வளாகம் குறிப்பிடத்தக்க தொல்பொருள் முக்கியத்துவம் வாய்ந்ததாக இருகின்றது.

ஆண்டுதோறும் ஆயிரக்கணக்கான சுற்றுலாப் பயணிகளை ஈர்க்கிறது. இது அநேகமாக இலங்கையில் அதிகம் பார்வையிடப்பட்ட சுற்றுலாத் தலமாகும்.

இங்கு பல விதமான கலாசார இடங்கள் காணப்படுகின்றன. சிகிரியாவின் மிகவும் குறிப்பிடத்தக்க அம்சங்களில் ஒன்று அதன் கண்ணாடி சுவர்.

பண்டைய காலத்தில் ராஜா தனது பிரதிபலிப்பைக் காணக்கூடிய வகையில் முழுமையாக மெருகூட்டப்பட்டது.

சிகிரியாவிற்கு வருகை தரும் பார்வையாளர்களால் எழுதப்பட்ட கல்வெட்டுகள் மற்றும் கவிதைகளால் கண்ணாடி சுவர் வரையப்பட்டுள்ளது.

இந்நிலையில் பாதுகாக்கப்பட்டுள்ள பழங்காலச் சுவர்களில் 70 சதவீதமானவை அழிந்துவிட்டதாக மத்திய கலாசார நிதியம் தெரிவித்துள்ளது.

அழிந்து வரும் சிகிரியா
சுவர்களில் நடமாடுவதை தவிர்க்குமாறு பார்வையாளர்களுக்கு அறிவுறுத்தும் பலகைகள் வைக்கப்பட்டுள்ளதாக மத்திய கலாசார நிதியத்தின் பணிப்பாளர் நாயகம் பேராசிரியர் காமினி ரணசிங்க தெரிவித்துள்ளார்.

பல சுற்றுலா பயணிகள் அடையாளங்களை புறக்கணிப்பதால், பழமையான செங்கல் சுவர்களை புதுப்பிக்க ஆண்டுதோறும் மில்லியன் கணக்கான ரூபாய் செலவிடப்பட வேண்டியதாக இருகிறது.

சிகிரியாவில் பிளாஸ்டிக் போத்தல்கள் அதிகமாக வீசப்படுவதால் அதனை சுற்றியுள்ள சுற்றுச்சூழல் அமைப்பும் கடுமையாக பாதிக்கப்பட்டு வருகின்றது என்பது குறிப்பிடத்தக்கது.