இந்தியா, பிரான்ஸ், யுஏஇ விமானப் படைகள் அரபிக் கடலில் பயிற்சி

அரபிக் கடல் பகுதியில் இந்தியா, பிரான்ஸ், ஐக்கிய அரபு அமீரகம் (யுஏஇ) நாடுகளின் விமானப் படைகள் இணைந்து செவ்வாய்க்கிழமை பயிற்சியில் ஈடுபட்டன.

காஸாவில் இஸ்ரேல் நடத்தி வரும் போரில் ஹமாஸுக்கு ஆதரவாக யேமனின் ஹூதி கிளா்ச்சியாளா்கள், செங்கடல்-அரபிக் கடல் பிராந்தியத்தில் பயணிக்கும் சரக்கு கப்பல்கள் மீது தாக்குதல் நடத்தி வருகின்றனா்.

இந்தச் சூழலில் 3 நாடுகளும் இணைந்து அரபிக் கடல் பகுதியில் ‘டெஸா்ட் நைட்’ விமானப் படை பயிற்சியை மேற்கொண்டன.

இந்தப் பயிற்சியில் இந்தியாவின் சு-30 எம்கேஐ, மிக்-29, ஜாக்குவாா் உள்ளிட்ட போா் விமானங்கள், சி-130-ஜெ விமானப் படை விமானம், வான்வழியில் எரிபொருள் நிரப்பும் விமானம் உள்ளிட்டவை பங்கேற்றன.

பிரான்ஸ் விமானப் படையின் ரஃபேல் போா் விமானங்கள், ஏா்பஸ் ஏ330 விமானம், ஐக்கிய அரபு அமீரகத்தின் எஃப்-16 போா் விமானம் ஆகியவை இந்தப் பயிற்சியில் பங்கேற்ாக இந்திய விமானப் படை வெளியிட்ட அறிவிக்கையில் தெரிவிக்கப்பட்டுள்ளது.

தில்லியில் வெள்ளிக்கிழமை நடைபெறும் குடியரசு தினவிழாவில் பிரான்ஸ் அதிபா் இமானுவல் மேக்ரான் சிறப்பு விருந்தினராகப் பங்கேற்கிறாா். இதையொட்டி, பிரான்ஸின் 2 ரஃபேல் போா் விமானங்களும், ஏா்பஸ் ஏ330 விமானப் படை விமானமும் விமானப் படை சாகச நிகழ்ச்சியில் பங்கேற்கின்றன.