நாட்டில் பல வேலைவாய்ப்புக்கள் இருக்கின்றன : மனுஷ நாணயக்கார தெரிவிப்பு

முன்னாள் ஜனாதிபதி ஜே.ஆர். ஜயவர்தனவினால் (JR Jayawardena) இலங்கையில் அறிமுகப்படுத்தப்பட்ட திறந்த பொருளாதார நடவடிக்கைகளை தொடர்ந்து முன்னெடுக்க அனுமதி வழங்கப்பட்டிருக்கவில்லை என தொழில் மற்றும் வெளிநாட்டு வேலைவாய்ப்பு அமைச்சர் மனுஷ நாணயக்கார (Manusha Nanayakkara) தெரிவித்துள்ளார்.

அங்குனுகொலபெலஸ்ஸ சிறைச்சாலை விளையாட்டரங்கில் நேற்று (11.05.2024) நடைபெற்ற நிகழ்வொன்றில் கலந்துகொண்டு கருத்து தெரிவிக்கையிலேயே அவர் மேற்கண்டவாறு குறிப்பிட்டுள்ளார்.

அவர் மேலும் கூறுகையில், “திறந்த பொருளாதாரத்தை உலகிற்கு அறிமுகப்படுத்திய பிரித்தானியாவின் முன்னாள் பிரதமர் மார்கரெட் தச்சரை உலகமே பாராட்டியது.

திறந்த பொருளாதாரம்
ஆனால், அந்த பொருளாதாரம் ஜே.ஆர். ஜயவர்தனவால் இலங்கைக்கு அறிமுகப்படுத்தப்பட்ட போதும் அதனை தொடர அவர் அனுமதிக்கப்படவில்லை.

இந்நிலையில், எங்களுக்கு வேலை இல்லை, தொழில் தொடங்க முடியாது. கஷ்டம். இவைகளைத்தான் நாம் மனதில் நினைத்துக் கொண்டிருக்கிறோம் அல்லவா.

உண்மையில் நாட்டில் பல வேலைகள் உள்ளன. ஆனால் நாம் அதற்கு ஏற்றதாக இல்லை. தனியார் வேலைகள் பற்றி நாளிதழில் விளம்பரம் வந்தாலும் அந்த வேலைவாய்ப்புகளுக்கு தகுதிகள் தேவை என்பதால் குறித்த வேலைக்கு செல்ல முடியாது.

அதேவேளை, சுற்றுலாத்துறையை பார்த்தால், எங்களிடம் பணம் இல்லை, அனுபவமும் இல்லை.

வேலைவாய்ப்புக்கள்
நமது மனித மூலதனத்தை மேம்படுத்தி புதிய உலகிற்கு செல்ல வேண்டும். நாம் சிக்கலில் இருக்கும்போது எப்படி தொடங்குவது? இதை மாற்ற நாம் எங்கிருந்தாவது தொடங்க வேண்டும்.

ஓராண்டுக்கு முன்பு, நாடாளுமன்றத்தில் 225 பேரும் தேவையில்லை என ஒரு பிரபலமான முழக்கம் இருந்தது. கடைசியாக 225 எல்லாம் வேண்டாம் என பிரச்சாரம் செய்து பெரும் சிக்கலில் மாட்டிக்கொண்டோம்.

அதன்பிறகு பெரும் நெருக்கடியை எதிர்கொண்டு, நாட்டின் பொறுப்பை ஏற்கச் சொன்னபோது பலர் ஏற்கவில்லை. அந்த முறைமை பற்றி யாருக்கும் புரியவில்லை. முறைமை மற்றும் அதை எவ்வாறு உருவாக்குவது என்பது உங்களுக்கு புரியவில்லை என்றால், முன்னேறுவது கடினம்.

இப்போது நல்ல விமர்சகர்கள் இருக்கிறார்கள். ஆனால் விமர்சிப்பவர்கள் தொழிலாளர்கள் அல்ல. படம் பார்த்து விமர்சனம் எழுதுபவர்கள் பலர் இருக்கிறார்கள் ஆனால் அவர்களால் திரைப்படம் எடுக்க முடியாது. நாம் உழைக்க ஆரம்பிக்க வேண்டும்” என குறிப்பிட்டுள்ளார்.