கேஜரிவாலுக்கு சலுகை காட்டவில்லை: ஜாமீன் வழங்கியது குறித்து உச்சநீதிமன்றம்

‘தில்லி முதல்வா் அரவிந்த் கேஜரிவாலுக்கு இடைக்கால ஜாமீன் வழங்கியதில் எந்தவித சலுகையும் காட்டப்படவில்லை’ என்று உச்சநீதிமன்றம் வியாழக்கிழமை தெளிவுபடுத்தியது.

கேஜரிவாலுக்கு உச்சநீதிமன்றம் சிறப்பு சலுகை அளிப்பதாக விமா்சனங்கள் எழுந்த நிலையில், இந்தக் கருத்தை உச்சநீதிமன்ற நீதிபதிகள் தெரிவித்தனா்.

தில்லி அரசின் 2021-22-ஆம் ஆண்டுக்கான கலால் கொள்கையை (மதுபானக் கொள்கை) வகுத்ததிலும், நடைமுறைப்படுத்தியதிலும் முறைகேடுகள் நடைபெற்ாகக் குற்றச்சாட்டு எழுந்தது. இது தொடா்பாக சிபிஐ-யும், அமலாக்கத் துறையும் தனித்தனியாக வழக்குப் பதிவு செய்து விசாரணை மேற்கொண்டு வருகின்றன.

சட்டவிரோத பணப் பரிவா்த்தனை தடுப்புச் சட்டத்தின் கீழ் இந்த வழக்கை விசாரித்துவரும் அமலாக்கத் துறை, தில்லி முதல்வரும் ஆம் ஆத்மி தேசிய அமைப்பாளருமான அரவிந்த் கேஜரிவாலை கடந்த மாா்ச் 21-ஆம் தேதி கைது செய்தது. பின்னா், திகாா் சிறையில் அடைக்கப்பட்ட கேஜரிவாலின் நீதிமன்றக் காவல் அடுத்தடுத்து நீட்டிக்கப்பட்டது. தில்லி நீதிமன்றம் அண்மையில் பிறப்பித்த உத்தரவின்படி, அவருக்கு மே 20-ஆம் தேதி வரை காவல் நீட்டிக்கப்பட்டிருந்தது.

இந்நிலையில், மக்களவைத் தோ்தல் பிரசாரத்தில் ஈடுபட கேஜரிவாலுக்கு இடைக்கால ஜாமீன் வழங்க வேண்டுமென உச்சநீதிமன்றத்தில் அவரது தரப்பில் கோரப்பட்டது. இந்த மனுவை விசாரித்த உச்சநீதிமன்றம், கேஜரிவாலுக்கு ஜூன் 1-ஆம் தேதி வரை (இறுதிக் கட்ட வாக்குப் பதிவு நாள்) நிபந்தனைகளுடன் இடைக்கால ஜாமீன் வழங்கியும், ஜூன் 2-ஆம் தேதி அவா் மீண்டும் சரணடைய வேண்டும் என்றும் கடந்த 10-ஆம் தேதி உத்தரவிட்டது.

அதனடிப்படையில், சிறையிலிருந்து விடுவிக்கப்பட்ட கேஜரிவால், தோ்தல் பிரசாரத்தில் தீவிரமாக ஈடுபட்டு வருகிறாா்.

உச்சநீதிமன்ற நீதிபதிகள் சஞ்சீவ் கன்னா, தீபாங்கா் தத்தா ஆகியோா் அடங்கிய அமா்வில் இந்த விவகாரம் வியாழக்கிழமை மீண்டும் விசாரணைக்கு வந்தது.

அப்போது, அமலாக்கத் துறை தரப்பில் ஆஜரான சொலிசிட்டா் ஜெனரல் துஷாா் மேத்தா, ‘கேஜரிவால் ஜாமீன் நிபந்தனைகளை மீறிச் செயல்பட்டு வருகிறாா். இது நீதிமன்றத்தின் மீதான தாக்குதலாகும். பிரசாரத்தில் அவா் ஆட்சேபத்துக்குரிய வகையில் பேசி வருகிறாா். தோ்தலில் மக்கள் ஆம் ஆத்மிக்கு சாதகமாக வாக்களித்தால், கேஜரிவால் ஜூன் 2-ஆம் தேதி சிறைக்குத் திரும்பமாட்டாா்’ என்றாா்.

இதைக் கேட்ட நீதிபதிகள், ‘கேஜரிவால் எப்போது சரணடைய வேண்டும் என்ற எங்களுடைய உத்தரவு தெளிவாக உள்ளது. இது உச்சநீதிமன்றத்தின் உத்தரவு. இந்த உத்தரவின் மூலம் சட்டத்தின் ஆட்சி நிா்வகிக்கப்படும். மேலும், தோ்தல் பிரசாரத்தில் இந்த வழக்கு தொடா்பாக எதுவும் பேசக் கூடாது என்று ஜாமீன் உத்தரவில் கேஜரிவாலுக்கு எந்தவித நிபந்தனையையும் உச்சநீதிமன்றம் விதிக்கவில்லை’ என்றனா்.

அப்போது குறுக்கிட்ட கேஜரிவால் தரப்பு வழக்குரைஞா் அபிஷேக் சிங்வி, மத்திய உள்துறை அமைச்சா் அமித் ஷாவின் பெயரைக் குறிப்பிடாமல், ‘உச்சநீதிமன்றம் கேஜரிவாலுக்கு சிறப்புச் சலுகை அளித்திருக்கிறது என்று சிலா் விமா்சனம் செய்கின்றனா்’ என்று கூறினாா்.

இதைக் கேட்ட நீதிபதிகள், ‘கேஜரிவாலுக்கு இடைக்கால ஜாமீன் வழங்கியதில் எந்தவித விதிவிலக்கையும் உச்சநீதிமன்றம் கடைப்பிடிக்கவில்லை. அதே நேரம், உச்சநீதிமன்றத் தீா்ப்பின் மீது ஆக்கபூா்வமான விமா்சனங்கள் வரவேற்கப்படுகின்றன’ என்றனா்.

பெட்டிச் செய்தி…

‘குற்றப்பத்திரிகையில் ஆம் ஆத்மி’

‘தில்லி முதல்வா் அரவிந்த் கேஜரிவால் மற்றும் ஆம் ஆத்மி கட்சிக்கு எதிராக விரைவில் குற்றப்பத்திரிகை தாக்கல் செய்யப்படும்’ என்று உச்சநீதிமன்றத்தில் அமலாக்கத் துறை சாா்பில் வியாழக்கிழமை தெரிவிக்கப்பட்டது.

உச்சநீதிமன்ற நீதிபதிகள் சஞ்சீவ் கன்னா, தீபாங்கா் தத்தா ஆகியோா் அடங்கிய அமா்வில் அமலாக்கத் துறை தரப்பில் ஆஜரான கூடுதல் சொலிசிட்டா் ஜெனரல் எஸ்.வி.ராஜு இந்தத் தகவலைத் தெரிவித்தாா்.

அவா் மேலும் கூறுகையில், ‘தில்லி கலால் கொள்கை முறைகேட்டுடன் தொடா்புடைய சட்டவிரோத பணப் பரிவா்த்தனை வழக்கில் அரவிந்த் கேஜரிவால் மற்றும் ஆம் ஆத்மி கட்சிக்கு எதிராக குற்றப்பத்திரிகையை அமலாக்கத் துறை தயாா் செய்து வருகிறது. தில்லி மதுபான ஒப்பந்தத்துக்கு கைம்மாறாக கேஜரிவால் ரூ.100 கோடி லஞ்சம் கேட்டதற்கும், அந்தப் பணத்தை கோவா சட்டப்பேரவைத் தோ்தல் பிரசாரத்தில் ஆம் ஆத்மி பயன்படுத்தியதற்கும் போதிய ஆதாரங்கள் அமலாக்கத் துறையிடம் உள்ளன.

கோவாவில் கேஜரிவால் ஏழு நட்சத்திர ஹோட்டலில் தங்கியதற்கும், அதற்கான செலவில் ஒரு பகுதியை வழக்கில் குற்றஞ்சாட்டப்பட்ட ஒருவா் செலுத்தியதற்கும் நேரடி ஆதாரங்கள் உள்ளன. அந்த வகையில், சா்ச்சைக்குரிய தில்லி கலால் கொள்கையை வகுத்ததில் கேஜரிவால் முக்கியப் பங்காற்றியுள்ளாா். இந்த ஆதாரங்களுடன் நீதிமன்றத்தில் விரைவில் குற்றப்பத்திரிகை தாக்கல் செய்யப்படும்’ என்றாா்.