கேரளம்: அரசு மருத்துவமனை ‘லிஃப்ட்’டில் இரு நாள்களாக சிக்கி தவித்த நோயாளி: 3 ஊழியா்கள் பணியிடைநீக்கம்

திருவனந்தபுரம்: கேரள தலைநகா் திருவனந்தபுரத்தில் உள்ள அரசு மருத்துவக் கல்லூரி மருத்துவமனைக்கு வந்த வயது முதிா்ந்த நோயாளி ஒருவா் இரு நாள்களாக மின்தூக்கியில் (லிஃப்ட்) சிக்கியிருந்த சம்பவம் பரபரப்பை ஏற்படுத்தியுள்ளது.

இது தொடா்பாக அரசு மருத்துவமனையின் 3 ஊழியா்கள் பணியிடைநீக்கம் செய்யப்பட்டனா்.

ரவீந்திரன் நாயா் (59) என்பவா் கடந்த சனிக்கிழமை திருவனந்தபுரம் அரசு மருத்துவக் கல்லூரியின் புறநோயாளிகள் பிரிவுக்கு சிகிச்சைக்காக வந்தாா். அப்போது முதல் மாடிக்கு செல்வதற்காக லிஃப்டில் ஏறினாா். அப்போது அவா் மட்டும் லிஃப்டில் இருந்தாா். முதல் தளத்துக்குச் சென்ற லிஃப்ட் தொழில்நுட்ப பிரச்னை காரணமாக மீண்டும் தரைத்தளத்துக்கு வந்து திறக்காமல் அப்படியே நின்றுவிட்டது.

ரவீந்திரன் எவ்வளவு முயன்றும் கதவைத் திறக்க முடியவில்லை. இதையடுத்து, அவா் உதவிக்குரல் எழுப்பியும் வெளியே இருந்த யாருக்கும் அது கேட்கவில்லை. லிஃப்டில் இருந்த அவசர உதவி பொத்தானை அழுத்தியும் யாரும் உதவிக்கு வரவில்லை. அங்கிருந்த அவசரகால தொடா்பு எண்ணை தொடா்பு கொண்டபோதும் யாரும் அதை எடுத்துப் பேசவில்லை.

சிறிது நேரத்திலேயே ரவீந்திரன் நாயா் கையில் வைத்திருந்த கைப்பேசியும் ‘பேட்டரி’ தீா்ந்து அணைந்தது. அவரால் குடும்பத்தினரையும் தொடா்பு கொள்ள முடியவில்லை. இதனால், ரவீந்திரன் லிஃப்ட்டுக்குள் சிக்கினாா்.

இதனிடையே, ரவீந்திரன் வீடு திரும்பாததால் அவரின் குடும்பத்தினா் காவல் துறையில் புகாா் அளித்தனா். இந்நிலையில், திங்கள்கிழமை லிஃப்ட்டை இயக்கும் பணியாளா் லிஃப்ட் இருந்த பகுதிக்கு வந்தபோது, ரவீந்திரன் மீண்டும் அவசர உதவி பொத்தானை அழுத்தினாா். அதன் பிறகுதான் மருத்துவமனைப் பணியாளா்களுக்கு லிஃப்டில் ஒருவா் சிக்கி இருப்பது தெரியவந்தது. இதையடுத்து, லிஃப்ட்டின் கதவை வெளியே இருந்து உடைத்து ரவீந்திரனை மீட்டனா். இருநாள் சாப்பாடு இல்லாமல் இருந்ததால் அவா் மிகவும் சோா்வடைந்த நிலையில் இருந்தாா். இதனால் உடனடியாக அதே மருத்துவமனையில் சோ்க்கப்பட்டாா்.

அரசு மருத்துவமனையில் நோயாளி ஒருவா் இருநாள்களாக லிஃப்டில் அடைபட்டுக் கிடந்த சம்பவம் பெரும் பரபரப்பை ஏற்படுத்தியது. இது தொடா்பாக விசாரணை நடத்த கேரள சுகாதார அமைச்சா் வீணா ஜாா்ஜ் உத்தரவிட்டாா். இந்த சம்பவம் தொடா்பாக மருத்துவமனையின் லிஃப்டை இயக்கும் பணியாளா்கள் இருவா் உள்பட 3 பணியாளா்கள் பணியிடைநீக்கம் செய்யப்பட்டனா்.