காசாவில் குழந்தைகள் போலியோவால் பாதிக்கப்படும் அபாயம்! உலக சுகாதார அமைப்பு எச்சரிக்கை

காசாவில்(Gaza) குழந்தைகள் போலியோவால் பாதிக்கப்படும் அபாயம் ஏற்பட்டுள்ளதாக உலக சுகாதார அமைப்பு தெரிவித்துள்ளது.

காசா மீது இஸ்ரேல்(Israel) நடத்தி வரும் போர் கடந்த சில மாதங்களாக தொடர்ந்து வருகின்றது.இந்த போரில் குழந்தைகள், பெண்கள் உள்பட 39 ஆயிரத்திற்கும் மேற்பட்டோர் பலியாகி உள்ளனர்

இந்நிலையில் காசாவில் குழந்தைகள் போலியோவால் பாதிக்கப்பட்டுள்ளதாக கூறப்படுகின்றது.

தொற்று நோய்
இது குறித்து அந்த அமைப்பின் செய்தித் தொடர்பாளர் கூறும்போது, காசாவில் கழிவுநீர் மாதிரிகளில் தொற்று நோய் இருப்பது சமீபத்தில் கண்டறியப்பட்டது.

போலியோ வைரஸைக் கண்டறிவதைத் தவிர, காசாவில் சுகாதார நிலைமைகள் மோசமடைந்து வருவதால், ஹெபடைடிஸ் ஏ, வயிற்றுப்போக்கு மற்றும் இரைப்பை குடல் அழற்சி ஆகியவை பரவலான அதிகரிப்பு ஏற்பட்டுள்ளதாக கூறப்படுகின்றது.

காசாவில் இஸ்ரேலின் போர் கழிவுநீர் மற்றும் நீர் அமைப்புகளை சேதப்படுத்தி அழித்துள்ளது, மேலும் இடம்பெயர்ந்த பாலஸ்தீனியர்களுக்கான சில முகாம்களுக்கு அருகில் கழிவுநீர் தெருக்களில் கொட்டியுள்ளது.

உலக சுகாதார நிறுவனம்
பாலஸ்தீனியர்கள் குளியலறைகள் இல்லாமல், சுகாதாரம் இல்லாமல், தண்ணீர், சுகாதாரம் இல்லாமல் தற்காலிக கூடாரங்களில் வாழ்ந்து வருகின்றனர்.எங்கு பார்த்தாலும் கழிவுநீர் தேங்கியுள்ளது.

உலக சுகாதார நிறுவனம் காசாவிற்கு 1 மில்லியன் போலியோ தடுப்பூசிகளை அனுப்புகிறது. தடுப்பூசிகள் குழந்தைகளைச் சென்றடைவதை உறுதிசெய்ய போர்நிறுத்தம் தேவை. என குறிப்பிட்டுள்ளார்.

போலியோ தொற்றுநோய் பரவுவதைத் தடுக்க உடனடியாக நடவடிக்கை எடுக்க வேண்டும் என்று காசாவின் சுகாதார அமைச்சகம் தெரிவித்துள்ளமை குறிப்பிடத்தக்கது.