யாழில் 18 தமிழக கடற்தொழிலாளர்கள் கைது – கடந்த 11 மாதத்தில் 515 பேர் கைது

யாழ்ப்பாண கடற்பரப்பினுள் அத்துமீறி நுழைந்து மீன் பிடியில் ஈடுபட்ட 18 தமிழக கடற்தொழிலாளர்கள் கைது செய்யப்பட்டுள்ளனர்.

வெற்றிலைக்கேணி மற்றும் சுண்டிக்குளம் கடற்பரப்பினுள் நேற்றைய தினம் திங்கட்கிழமை அத்துமீறி நுழைந்து கடற்தொழிலில் ஈடுபட்டிருந்த தமிழக கடற்தொழிலாளர்களை சுற்றுக்காவல் நடவடிக்கையில் ஈடுபட்டிருந்த கடற்படையினர் கைது செய்துள்ளனர்.

கைது செய்யப்பட்ட கடற்தொழிலாளர்களை காங்கேசன்துறை கடற்படை முகாமிற்கு அழைத்து வந்த கடற்படையினர் , கடற்தொழில் நீரியல் வளத்துறை அதிகாரிகள் ஊடாக பருத்தித்துறை நீதவான் நீதிமன்றில் முற்படுத்த நடவடிக்கை எடுத்துள்ளனர்.

கைது நடவடிக்கையின் போது தமிழக கடற்தொழிலாளர்களின் படகொன்றினையும் கடற்படையினர் கைப்பற்றி இருந்தனர். குறித்த படகு மயிலிட்டி மீன்பிடித்துறை முகத்தில் தடுத்து வைக்கப்பட்டுள்ளது.

இந்த ஆண்டு டிசம்பர் 02ஆம் திகதி வரையில் இலங்கை கடற்பரப்பினுள் அத்துமீறி நுழைந்த குற்றச்சாட்டில் 515 தமிழக கடற்தொழிலாளர்கள் கைது செய்யப்பட்டுள்ளதுடன் , அவர்களின் 66 மீன்பிடி படகுகளையும் கடற்படையினர் கைப்பற்றியுள்ளனர் என்பது குறிப்பிடத்தக்கது.