5 வயதுக்குட்பட்ட குழந்தைகளுக்கு ஒமைக்ரான் பாதிப்பு குறைவாக உள்ளது – அமெரிக்க நிபுணர் தகவல்…!!

தென் ஆப்பிரிக்காவில் கண்டறியப்பட்ட உருமாறிய கொரோனாவான ஒமைக்ரான் வைரஸ் 120-க்கும் மேற்பட்ட நாடுகளில் பரவி உள்ளது. குறிப்பாக அமெரிக்கா, இங்கிலாந்து மற்றும் ஐரோப்பிய நாடுகளில் ஒமைக்ரான் வைரஸ் அதிக பாதிப்புகளை ஏற்படுத்தி வருகிறது.

மிகவும் வேகமாக பரவும் தன்மை கொண்ட ஒமைக்ரான் வைரசால் அமெரிக்காவில் கொரோனா பாதிப்பு உயர்ந்து கொண்டே செல்கிறது. அங்கு தினசரி பாதிப்பு 8 லட்சத்துக்கும் மேல் உள்ளது.

மேலும் தினசரி கொரோனா பாதிப்பில் 90 சதவீதம் ஒமைக்ரான் வைரசால் ஏற்பட்டுள்ளது என்று தெரிவிக்கப்பட்டு இருக்கிறது. இதனால் அமெரிக்காவில் ஆஸ்பத்திரிகள் நிரம்பி வழிகின்றன.

இந்த நிலையில் ஒமைக்ரான் வைரஸ் 5 வயதுக்குட்பட்ட குழந்தைகளுக்கு அதிக பாதிப்பை ஏற்படுத்தவில்லை என்று அமெரிக்க நிபுணர் தெரிவித்துள்ளார்.

அமெரிக்காவின் நோய் கட்டுப்பாட்டு மைய இயக்குனர் டாக்டர் ரோச்சலே பெலன்ஸ்கை கூறியதாவது:-

அமெரிக்காவில் ஒமைக்ரான் வைரசால் கொரோனா பாதிப்பு அதிகரித்தபடியே இருக்கிறது. இதனால் ஆஸ்பத்திரிகளில் சேரும் நோயாளிகளின் எண்ணிக்கை உயர்ந்து வருகிறது. குழந்தைகளுக்கும் கொரோனா பாதிப்பு ஏற்பட்டு வருகிறது.

அதே வேளையில் 5 வயதுக்குட்பட்ட குழந்தைகளுக்கு ஒமைக்ரான் வைரசால் கடுமையான பாதிப்பு எதுவும் ஏற்படவில்லை. அவர்களுக்கு ஒமைக்ரான் வைரசால் அதிக பாதிப்பு ஏற்படுத்தும் அறிகுறிகளை நாங்கள் இதுவரை காணவில்லை.

4 வயதுக்கு கீழ் உள்ள குழந்தைகளுக்கு நாம் பாதுகாப்புகளை வழங்க வேண்டும். அவர்களை சுற்றி இருப்பவர்கள் தடுப்பூசியை செலுத்திக் கொள்ள வேண்டும். இது மிகவும் முக்கியமானது.

கொரோனா தடுப்பூசி

இவ்வாறு அவர் கூறினார்.

அமெரிக்காவில் 5 வயதுக்கு மேற்பட்ட குழந்தைகளுக்கு தடுப்பூசி செலுத்தப்பட்டு வருகிறது. 5 வயதுக்குட்பட்ட குழந்தைகளுக்கு தடுப்பூசி செலுத்துவதற்கான அனுமதி இன்னும் வழங்கப்படவில்லை.