தினசரி பாதிப்பு 4-வது நாளாக குறைந்தது: புதிதாக 7,633 பேருக்கு கொரோனா!!

இந்தியாவில் கொரோனா தினசரி பாதிப்பு இன்று 7,633 ஆக குறைந்துள்ளது. கடந்த 14-ந் தேதி பாதிப்பு 11,109 ஆக இருந்தது. மறுநாள் 10,753, 16-ந்தேதி 10,093, நேற்று 9,111 ஆக இருந்த நிலையில் தொடர்ந்து 4-வது நாளான இன்றும் பாதிப்பு குறைந்துள்ளது. நேற்று அதிகபட்சமாக கேரளாவில் 1,524 பேருக்கு தொற்று உறுதியாகி உள்ளது.

டெல்லியில் 1,017, அரியானாவில் 898, தமிழ்நாட்டில் 521, மகாராஷ்டிராவில் 505, உத்தரபிரதேசத்தில் 446, சத்தீஸ்கரில் 476, இமாச்சலபிரதேசத்தில் 376 பேருக்கு தொற்று கண்டறியப்பட்டுள்ளது. இதுவரை பாதிக்கப்பட்டவர்களின் மொத்த எண்ணிக்கை 4 கோடியே 48 லட்சத்து 34 ஆயிரத்து 859 ஆக உயர்ந்துள்ளது. தொற்று பாதிப்பில் இருந்து நேற்று 6,702 பேர் உள்பட இதுவரை 4 கோடியே 42 லட்சத்து 42 ஆயிரத்து 474 பேர் குணமடைந்துள்ளனர்.

தற்போது ஆஸ்பத்திரிகளில் 61,233 பேர் சிகிச்சை பெற்று வருகிறார்கள். இது நேற்றைவிட 920 அதிகமாகும். தொற்று பாதிப்பால் நேற்று டெல்லியில் 4 பேர், அரியானா, கர்நாடகா, பஞ்சாபில் தலா ஒருவர் என 7 பேர் இறந்துள்ளனர். கேரளாவில் விடுபட்ட பலிகளில் 4 ஐ கணக்கில் சேர்த்துள்ளனர். மொத்த பலி எண்ணிக்கை 5 லட்சத்து 31 ஆயிரத்து 152 ஆக உயர்ந்துள்ளது.