ஒலிம்பிக்கில் பங்கேற்க ரஷ்யாவிற்கு தடை..! மற்றொரு நாடும் பங்கேற்க முடியாது !!

எதிர்வரும் 2024 ஆம் ஆண்டு இடம்பெறவிருக்கும் பாரிஸ் ஒலிம்பிக்கில் பங்கேற்க உள்ள நாடுகள் பட்டியலில் ரஷ்யாவும் பெலாரஸும் நீக்கப்பட்டுள்ளதாக அறிவிக்கப்பட்டுள்ளது.

ஒலிம்பிக் போட்டிகளில் பங்கேற்க அழைக்கப்பட்ட 203 நாடுகளின் பட்டியலில் ரஷ்யாவும் பெலாரஸும் இல்லை என்று சர்வதேச ஒலிம்பிக் கமிட்டி (International Olympic Committee) அறிவித்தது.

இந்த நாடுகளைச் சேர்ந்த விளையாட்டு வீரர்கள் நடுநிலையாளர்களாக ஒலிம்பிக்கில் பங்கேற்க அனுமதி பெறலாம். எனினும், இது குறித்து பின்னர் முடிவு எடுக்கப்படும் என ஐஓசி தெரிவித்துள்ளது.

அமைதியான போட்டியில் உலகம் முழுவதையும் ஒன்றிணைப்பதே ஒலிம்பிக் போட்டிகளின் நோக்கம் என்று ஐஓசி தலைவர் தாமஸ் பாக் கூறினார்.

உலகில் மோதல்கள், பிளவுகள் மற்றும் போர்கள் அதிகரித்து வரும் நிலையில் இந்த ஒன்றிணைக்கும் சக்தி முன்னெப்போதையும் விட அதிகமாக தேவைப்படுகிறது என்றும் அவர் கூறினார். உக்ரைன் படையெடுப்பிற்குப் பிறகு, ரஷ்யா மற்றும் பெலாரஸ் விளையாட்டு வீரர்கள் பல சர்வதேச விளையாட்டு நிகழ்வுகளில் இருந்து தடை செய்யப்பட்டனர்.

இந்நிலையில், இந்த ஆண்டு சில கட்டுப்பாடுகள் நீக்கப்பட்டன. 2022 தடைக்குப் பிறகு இந்த ஆண்டு விம்பிள்டன் போட்டியில் பங்கேற்க ரஷ்ய மற்றும் பெலாரஷ்ய வீரர்கள் அனுமதிக்கப்பட்டமை குறிப்பிடத்தக்கது.

பாரிஸ் ஒலிம்பிக் 2024 ஜூலை 26 அன்று தொடங்கி ஆகஸ்ட் 11 வரை நடைபெறும். பாலின சமத்துவம் கொண்ட முதல் ஒலிம்பிக் போட்டி இதுவாகும். ஆண்களுக்கும் பெண்களுக்கும் ஒரே எண்ணிக்கையிலான இடங்கள் ஒதுக்கப்பட்டுள்ளதாக ஐஓசி தெரிவித்துள்ளது.