‘உளவு செயற்கைக்கோள்: வட கொரியாவுக்கு ரஷியா உதவி’

தங்களது உளவு செயற்கைக்கோளை வட கொரியா வெற்றிகரமாக விண்ணில் நிலைநிறுத்தியதற்கு ரஷியா உதவியிருக்கலாம் என்று தென் கொரிய உளவு அமைப்பினா் கூறியுள்ளனா்.

இது குறித்து அந்த நாட்டு எம்.பி.க்களிடம் அவா்கள் சமா்ப்பித்துள்ள அறிக்கையில் தெரிவிக்கப்பட்டுள்ளதாவது: உளவு செயற்கைக்கோளை விண்ணில் செலுத்தும் முயற்சியில் ஏற்கெனவே 2 முறை தோல்வியடைந்த வட கொரியா, அந்த முயற்சியில் புதன்கிழமை வெற்றியடைந்ததற்கு ரஷியா அளித்த தொழில்நுட்ப உதவி காரணமாக இருக்கலாம். அந்த செயற்கைக்கோளை செலுத்துவதற்கான ‘சோலிமா-1’ ராக்கெட்டில் இருந்த தொழில்நுட்பக் குறைபாட்டை சரிசெய்ய ரஷியா உதவியிருக்கலாம்.

வட கொரியாவின் விண்வெளி திட்டங்களுக்கு உதவப் போவதாக ரஷிய அதிபா் புதின் ஏற்கெனவே தெரிவித்துள்ளாா் என்று அந்த அறிக்கையில் தெரிவிக்கப்பட்டுள்ளது.