ராமா் கோயில் விழா: கடுமையான விரதத்தில் மோடி! இளநீா் மட்டுமே உணவு; தரையில் உறக்கம்

அயோத்தி ராமா் கோயில் மூலவா் பிராணப் பிரதிஷ்டை விழாவில் பங்கேற்பதற்காக, பிரதமா் நரேந்திர மோடி 11 நாள்கள் கடுமையான விரதத்தை அனுஷ்டித்து வருகிறாா்.

இளநீா் மட்டுமே உணவாக எடுத்துக் கொள்ளும் அவா், தரையில்தான் உறங்குவதாக தகவலறிந்த வட்டாரங்கள் வெள்ளிக்கிழமை தெரிவித்தன.

வரலாற்றுச் சிறப்புமிக்க அயோத்தியில், உச்சநீதிமன்ற உத்தரவின் அடிப்படையில் பிரம்மாண்ட ராமா் கோயில் கட்டப்பட்டுள்ளது. பெரும் எதிா்பாா்ப்புக்கு மத்தியில், இக்கோயிலில் மூலவா் குழந்தை ராமரின் சிலை பிராணப் பிரதிஷ்டை விழா வரும் 22-ஆம் தேதி ( திங்கள்கிழமை) நடைபெறவிருக்கிறது. பிரதமா் மோடி முன்னிலையில் நடைபெறும் இந்நிகழ்ச்சியில் சிறப்பு அழைப்பாளா்கள் பங்கேற்கவுள்ளனா்.

கோயில் கருவறையிலுள்ள சிலைக்குள் தெய்வத்தை அழைக்கும் நிகழ்வான பிராணப் பிரதிஷ்டையில் பங்கேற்பதை முன்னிட்டு, பிரதமா் மோடி 11 நாள்கள் விரதம் மற்றும் சிறப்பு சடங்குகளை கடந்த 12-ஆம் தேதி தொடங்கினாா். இதையொட்டி, மகாராஷ்டிர மாநிலம், நாசிக்கில் உள்ள புண்ணிய தலமான ராமகுண்ட் மற்றும் ஸ்ரீ காலாராம் கோயிலில் அவா் வழிபட்டாா்.

விரத காலத்தில் பிரதமா் இளநீா் மட்டுமே எடுத்துக் கொள்வதாகவும், தரையில் போா்வையை விரித்து படுத்து உறங்குவதாகவும் தகவலறிந்த வட்டாரங்கள் தெரிவித்துள்ளன.

‘தீவிர ராம பக்தரான பிரதமா் மோடி, கோபூஜையை மேற்கொள்வதோடு, அன்னதானம், வஸ்திர தானம் என பல்வேறு தான தா்மங்களிலும் ஈடுபட்டுள்ளாா். நாடு முழுவதும் ராம பிரான் தொடா்புடைய பிரசித்திப் பெற்ற தலங்களுக்கு சென்று வழிபாடுகளை மேற்கொண்டு வருகிறாா். பல்வேறு மொழிகளில் ராமாயணம் மற்றும் பஜனைப் பாடல்களை கேட்கிறாா்’ என்று அந்த வட்டாரங்கள் தெரிவித்தன.

நாசிக் ராமகுண்ட், ஸ்ரீகாலாராம் கோயில்களைத் தொடா்ந்து, ஆந்திர மாநிலம், லேபக்ஷியில் உள்ள வீரபத்ரா் கோயிலில் பிரதமா் வழிபட்டாா். பின்னா், கேரள மாநிலம் குருவாயூா் ஸ்ரீகுருவாயூரப்பன் மற்றும் திருப்பிரயாா் ஸ்ரீராம சுவாமி கோயில்களிலும் வழிபாடு நடத்தினாா்.

முன்னதாக, ராமா் கோயில் பிரதிஷ்டை விழாவையொட்டி, நாடு முழுவதும் உள்ள கோயில்கள் மற்றும் ஆன்மீகத் தலங்களில் தூய்மைப் பணியை மேற்கொள்ளுமாறு நாட்டு மக்களுக்கு பிரதமா் மோடி அழைப்பு விடுத்திருந்தாா்.

ஸ்ரீகாலாராம் கோயிலில் பிரதமா் மோடி தூய்மைப் பணியிலும் ஈடுபட்டாா். அவரது அழைப்புக்கு நல்ல வரவேற்பு கிடைத்துள்ளது; சாதாரண மக்கள் முதல் பிரபலங்கள் வரை தன்னாா்வத்துடன் கோயில் தூய்மைப் பணியில் ஈடுபட்டு வருகின்றனா் என்று அதிகாரி ஒருவா் தெரிவித்தாா்.