காலை உணவு வழங்குவதில் தாமதம்: இரு ஆசிரியா்களுக்கு மெமோ

வேலூா்: வேலூா் கன்னிகாபுரம் மாநகராட்சித் தொடக்கப் பள்ளியில் மாணவா்களுக்கு காலை உணவு தினமும் தாமதமாக வழங்கப் படுவதை அறிந்த மாவட்ட ஆட்சியா் வி.ஆா்.சுப்புலட்சுமி, அப்பள்ளி ஆசிரியா்கள் இருவருக்கு விளக்கம் கேட்டு மெமோ வழங்கி உத்தரவிட்டாா்.

மேலும், பள்ளிகளில் தினமும் காலை 8 மணி முதல் 8.30 மணிக்குள் உணவு வழங்குவதை தலைமையாசிரியா், ஆசிரியா்கள் உறுதி செய்யவும் அறிவுறுத்தியுள்ளாா்.

வேலூா் மாநகராட்சி 52-ஆவது வாா்டுக்குட்பட்ட கன்னிகாபுரத்தில் தமிழ்நாடு நகா்ப்புற வாழ்விட மேம்பாட்டு வாரியம் சாா்பில் 224 அடுக்குமாடி குடியிருப்புகள் கட்டப்பட்டு பயனாளிகள் கடந்த 2 ஆண்டுகளாக வசித்து வருகின்றனா்.

இப்பகுதியில் கழிவுநீா் தடையின்றி செல்ல கால்வாய் வசதி இல்லாததால் இந்த குடியிருப்புகளில் இருந்து வெளியேறும் கழிவுநீா் குடியிருப்பு வளாகத்திலேயே தேங்கி சுகாதாரச் சீா்கேட்டை ஏற்படுத்தி வருகிறது. தவிர, கழிவுநீா் அருகிலுள்ள தனியாா் நிலங்களுக்குச் செல்வதால் தினமும் தகராறு ஏற்படுகிறது. எனவே, கன்னிகாபுரம் குடியிருப்பு பகுதியில் கழிவுநீா் கால்வாய் அமைக்கவும், அதுவரை தேங்கியுள்ள கழிவுநீரை தினமும் மாநகராட்சி லாரிகள் மூலம் அகற்றவும் மாவட்ட நிா்வாகம் நடவடிக்கை எடுக்க வேண்டும் எனக்கூறி அப்பகுதி மக்கள் கடந்த 30-ஆம் தேதி நடைபெற்ற மக்கள் குறைதீா்க்கும் கூட்டத்தில் ஆட்சியரிடம் கோரிக்கை விடுத்திருந்தனா்.

இதுதொடா்பாக, ஆட்சியா் வி.ஆா்.சுப்புலட்சுமி கன்னிகாபுரம் நகா்ப்புற வாழ்விட மேம்பாட்டு வாரிய குடியிருப்பு பகுதியில் செவ்வாய்க்கிழமை ஆய்வு மேற்கொண்டாா். அப்போது கழிவுநீா் பெருமளவில் தேங்கியிருப்பதை அறிந்து அப்பகுதியில் மாநகராட்சி சாா்பில் விரைவில் கழிவுநீா் கால்வாய் அமைக்க வேண்டும் என்றும், அதுவரை 3 கழிவுநீா் அகற்றும் லாரிகள் மூலம் தினமும் அங்கு தேங்கும் கழிவுநீரை உறிஞ்சி அப்புறப்படுத்த வேண்டும் என்றும் மாநகராட்சி ஆணையருக்கு உத்தரவிட்டாா். மேலும், அப்பகுதியில் குடிநீா் வழங்குவதில் குறைபாடு நிலவுவதாக பொதுமக்கள் தெரிவித்த நிலையில், இக்குடியிருப்பில் குடிநீா் இணைப்பு வழங்குவது தொடா்பாக நடவடிக்கை மேற்கொள்ளவும் உத்தரவிட்டாா்.

இதையடுத்து, மாவட்ட ஆட்சியா் கன்னிகாபுரம் மாநகராட்சி தொடக்கப்பள்ளிக்கு சென்று அங்கு முதல்வரின் காலை உணவுத் திட்டம் குறித்து ஆய்வு மேற்கொண்டாா். அப்போது, அந்த பள்ளியில் காலை 8.55 மணி வரை மாணவா்களுக்கு காலை உணவு வழங்கப்படாமல் இருந்தது தெரியவந்தது. இதுகுறித்து மாணவ, மாணவிகளிடம் ஆட்சியா் விசாரித்த போது தினமும் 9 மணிக்கு மேல்தான் காலை உணவு வழங்கப்படுவதாகவும் தெரிவித்துள்ளனா்.

இதைத்தொடா்ந்து, மாணவா்களுக்கு தாமதமாக காலை உணவு வழங்கப்படுவது குறித்து விளக்கம் கேட்டு அப்பள்ளியின் தலைமையாசிரியா், ஆசிரியா் என இருவருக்கும் ஆட்சியா் மெமோ அளித்தாா். மேலும், முதல்வரின் காலை உணவு திட்டத்தில் மாணவ, மாணவிகளுக்கு காலை 8 மணி முதல் 8.30 மணிக்குள் உணவு வழங்குவதை தலைமையாசிரியா், ஆசிரியா்கள் உறுதி செய்ய அறிவுறுத்தினாா்.

இந்த ஆய்வின் போது மாநகராட்சி மேயா் சுஜாதா ஆனந்தகுமாா், மாநகராட்சி ஆணையா் ஜானகி ரவீந்திரன், உதவி ஆணையா்கள், வட்டாட்சியா்கள் உள்பட பலா் உடனிருந்தனா்.