இஸ்ரேலின் கடற்கரை நகர் மீது நள்ளிரவில் காசாவிலிருந்து தாக்குதல்

இஸ்ரேல் (Israel) கடற்கரை நகரமான அஸ்கெலோனில் (Ashkelon) உள்ள குடியிருப்புக் கட்டடத்தின் மீது காசா பகுதியிலிருந்து ஏவுகணை தாக்குதல் நடத்தப்பட்டுள்ளது.

காசாவின் வடக்குப் பகுதியில் (North of Gaza) இருந்து 10 கிலோ மீற்றர் தொலைவில் உள்ள இந்தப் பகுதியில் நள்ளிரவில் நடந்த தாக்குதலில் 3 பேர் காயமுற்றதாக இஸ்ரேலிய செய்தி நிறுவனங்கள் நேற்று  (12) செய்தி வெளியிட்டுள்ளன.

ஹமாஸ் (Hamas) சமீப காலமாக இஸ்ரேலின் நகரங்கள் மற்றும் கிராமங்கள் மீது தாக்குதல் நடத்துவதை அதிகரித்துள்ள நிலையில் இஸ்ரேலின் கரீம் சலோம் (Kerem Shalom)எல்லைப் பகுதியும் நேற்று தாக்கப்பட்டதாக இராணுவம் தெரிவித்துள்ளது.

நான்கு ஏவுகணை தாக்குதல்
காசாவுக்குள் நிவாரண உதவிகள் கொண்டுவர பயன்படுத்தப்பட்ட இந்த எல்லைப் பகுதி மீது நான்கு ஏவுகணைகள் ஏவப்பட்டுள்ளன.

அவற்றில் ஒன்றை இஸ்ரேல் இராணுவம் இடைமறித்து தகர்த்ததாகவும் வாழ்விடமில்லாத இடங்களில் ஏவுகணை விழுந்ததால் பெரிய உயிரிழப்பு ஏற்படவில்லை எனவும் இராணுவம் தெரிவித்துள்ளது.

இஸ்ரேல் காசாவின் தெற்குப் பகுதியில் தாக்குதலை தீவிரப்படுத்தியுள்ள நிலையில் அதற்கு பதிலடி கொடுக்கும் வகையில் ஹமாஸ் இந்தத் தாக்குதல்களை தொடுத்துள்ளமை குறிப்பிடத்தக்கது.