மனைவிக்காக 320 கி.மீ பயணம்! இணையத்தை கலக்கும் கணவரின் காதல்

மனைவியுடன் இருக்க தினமும் 320 கி.மீ பயணிக்கும் சீனாவை சேர்ந்த கணவர் ஒருவர் சமூக வலைதளத்தில் பெரும் வரவேற்பை பெற்றுள்ளார்.

320 கி.மீ பயணம்
சீனாவின் 31 வயதான லின் ஷு(Lin Shu) என்ற புதிதாக திருமணமான நபர், தனது மனைவி மீதான அளவற்ற அன்பால் இணையத்தில் பரபரப்பாக பேசப்பட்டு வருகிறார்.

லின் ஷு தனது மனைவி இருக்கும் நகரில் வசிப்பதற்காக, தினமும் வேலைக்கு 320 கிலோமீட்டர் தொலைவு பயணித்து சென்று வருகிறார்.

இது தொடர்பாக டோயின் (Douyin) என்ற சமூக வலைதளத்தில் தனது தினசரி பழக்கவழக்கங்களை லின் ஷு பதிவு செய்துள்ளார்.

காலை 5 மணிக்கு எழுந்து 5:20 மணிக்கு வீட்டை விட்டு கிளம்பும் அவரது பயணம், மின்சார சைக்கிள், ரயில் பயணம், மெட்ரோ பயணம் என பல கட்டங்களை கடந்து காலை 9 மணிக்கு அலுவலகத்தை சென்றடைகிறது. மீண்டும் வீடு திரும்ப 3-4 மணி நேரம் ஆகிறது.

பயணத்திற்கு செலவிடும் நேரம் அதிகமாக இருந்தாலும், 7 வருடங்களாக காதலித்து வந்த தனது மனைவி மீதான அன்பே இதற்கு காரணம் என்று லின் ஷு அதில் தெரிவித்துள்ளார்.

சீன நகரங்களுக்கு இடையிலான போக்குவரத்து
சமூக வலைதள பயனாளர்கள் அவரது பயண நேரத்தை கண்டு ஆச்சரியம் தெரிவித்து வருகின்றனர்.

அதே நேரத்தில், சீன நகரங்களுக்கு இடையேயான போக்குவரத்து வசதி மற்றும் அவருக்கு ஆதரவான வேலை சூழல் ஆகியவை இதற்கு உதவிகரமாக இருப்பதாக லின் ஷீ குறிப்பிட்டுள்ளார்.

மேலும், இந்த நீண்ட பயணம் தற்காலிகமானது தான். தனது மனைவி தற்போது கிங்டாவோவில் (Qingdao) வேலை தேடி வருகிறார். அவர் வேலை கிடைத்தால் அங்கேயே குடியேற திட்டமிட்டு இருப்பதாகவும் தெரிவித்துள்ளார்.

லின் ஷு-வின் கதை டோயினில் பெரும் வரவேற்பை பெற்றுள்ளது. 7 மில்லியனுக்கும் அதிகமானோர் இவரது பதிவை பார்த்துள்ளனர்.