போலி செய்திகளை பரப்பும் சமூக ஊடகம் – உயர்தர மாணவர்களுக்கு பரீட்சை ஆணையாளரின் முக்கிய அறிவிப்பு

2024 உயர்தரப் பரீட்சைக்குத் தோற்றவுள்ள மாணவர்களை பரீட்சை திணைக்களத்தின் இணையத்தளத்திலிருந்து பிரத்தியேகமாக உத்தியோகபூர்வ அட்டவணையைப் பதிவிறக்கம் செய்யுமாறு பரீட்சைகள் ஆணையாளர் நாயகம் அமித் ஜயசுந்தர தெரிவித்துள்ளார்.

இன்று (30) நடைபெற்ற விசேட செய்தியாளர் சந்திப்பில் உரையாற்றிய ஜயசுந்தர, 2024 நவம்பர் 25 முதல் டிசம்பர் 20 வரையிலான உயர்தரப் பரீட்சையை ஒத்திவைக்கப்படாமல் திட்டமிட்டபடி நடத்துவதற்கான அனைத்து ஏற்பாடுகளும் நிறைவடைந்துள்ளதாக உறுதிப்படுத்தினார்.

இந்த வருடம் மார்ச் மாதம் பரீட்சை திகதிகள் தீர்மானிக்கப்பட்டதாக ஜயசுந்தர குறிப்பிட்டார். இருப்பினும், சமூக ஊடகங்களில் பரவும் தவறான தகவல்கள் குறித்து அவர் கவலை தெரிவித்தார், இது மாணவர்கள் மத்தியில் தேர்வு அட்டவணை குறித்து நிச்சயமற்ற தன்மையை உருவாக்கியுள்ளது.

எனவே பரீட்சைகள் திணைக்களத்தின் அறிவிப்புகளை மாத்திரம் நம்பியிருக்க வேண்டுமென பரீட்சைகள் ஆணையாளர் நாயகம் வலியுறுத்தியுள்ளார்.

சமூக ஊடக விளம்பரங்கள் அல்லது வேறு உத்தியோகபூர்வமற்ற ஆதாரங்களினால் பரீட்சார்த்திகள் தவறாக வழிநடத்தப்பட வேண்டாம் என்று கேட்டுக்கொண்டார்.

பரீட்சை அனுமதி அட்டைகள் விரைவில் பரீட்சார்த்திகளுக்கு வழங்கப்படும் என ஆணையாளர் நாயகம் மேலும் தெரிவித்தார்.

நாட்டின் தற்போதைய நெருக்கடிகளால் முன்வைக்கப்படும் சவால்கள் காரணமாக, பரீட்சைகளை ஒத்திவைக்க தனக்கும் திணைக்களத்திற்கும் பல கோரிக்கைகள் வந்துள்ளதாகவும் அவர் ஒப்புக்கொண்டார்.

எவ்வாறாயினும், உயர்தரப் பரீட்சைக்கான திகதிகள் அனைத்து பாடங்களையும் உள்ளடக்குவதற்குத் தேவையான மொத்த காலப்பகுதியை கவனத்தில் கொண்டு தீர்மானிக்கப்பட்டதாகவும் தெரிவித்துள்ளார்.

மேலும் அண்மைய ஆண்டுகளில் தேசியப் பரீட்சைகள் திட்டமிடல் முறைகேடுகளை எதிர்கொண்டுள்ளதாகவும், 2025 ஆம் ஆண்டின் பிற்பகுதியில் அல்லது 2026 ஆம் ஆண்டின் முற்பகுதியில் நிலைமை சீராகும் என்று அவர் நம்புவதாக தெரிவித்துள்ளமை குறிப்பிடத்தக்கது.