மறைத்து வைக்கப்பட்ட நிலையில் மற்றுமொரு வாகனம் சிக்கியது

வென்னப்புவ, மிரிஸ்ஸங்கொடுவ பிரதேசத்தில் வீடொன்றில் மறைத்து வைக்கப்பட்டிருந்த, ​​பதிவு செய்யப்படாத இலக்கத் தகடுகள் இல்லாத டிஃபென்டர் வாகனம் ஒன்று சந்தேகநபர்கள் இருவருடன் கைது செய்யப்பட்டுள்ளதாக வென்னப்புவ காவல்துறையினர் தெரிவித்தனர்.

லுனுவில, மிரிஸ்ஸங்கொடுவ பிரதேசத்தை சேர்ந்த இருவரே இவ்வாறு கைது செய்யப்பட்டுள்ளனர்.

காவல்துறைக்கு கிடைத்த தகவல்

அரசாங்கத்திற்கு சொந்தமான ஐந்து வாகனங்கள் வீடொன்றில் மறைத்து வைக்கப்பட்டிருந்ததாக காவல்துறைக்கு கிடைத்த தகவலின் அடிப்படையில் குறித்த வீட்டில் மேற்கொள்ளப்பட்ட சோதனையின் போது இந்த டிஃபென்டர் வாகனம் கண்டுபிடிக்கப்பட்டுள்ளது.

இலக்கங்கள் அழிப்பு

பிடிபட்ட டிஃபென்டரில் பதிவு எண் எதுவும் எழுதப்படவில்லை என்பதும், அடிச்சட்ட இலக்கம் மற்றும் இயந்திர இலக்கம் ஆகியவை அழிக்கப்பட்டு சிதைக்கப்பட்டிருப்பதும் சோதனையின் போது தெரியவந்ததாக காவல்துறையினர் கூறுகின்றனர்.

அண்மைக்காலமாக மறைத்து வைக்கப்பட்ட நிலையில் அரசுக்கு சொந்தமான வாகனங்கள் கைப்பற்றப்பட்டு வருகின்றமை குறிப்பிடத்தக்கது.