பிரித்தானிய மாணவர் விசா விண்ணப்பங்களில் 16 சதவீதம் சரிவு: காரணங்கள் என்ன?

பிரித்தானியாவில் சர்வதேச மாணவர் விசா விண்ணப்பங்களில் 16 சதவீதம் குறைவு ஏற்பட்டுள்ளது.

பிரித்தானிய உள்துறை அமைச்சகம் வெளியிட்ட தரவுகளின்படி, 2023 மற்றும் 2024 இடையிலான காலத்தில் விண்ணப்பங்கள் 4,28,100-ல் இருந்து 3,59,600 ஆக சரிந்துள்ளன.

மேலும், மாணவர்களின் சார்ந்தோருக்கான விசா விண்ணப்பங்கள் 85% குறைந்துள்ளது.

2024 ஜனவரியில் அறிமுகப்படுத்தப்பட்ட புதிய குடிவரவு விதிகள் இச்சரிவுக்கு காரணமாகும்.

இந்த மாற்றங்களின்படி, மாணவர்கள் தங்களுடன் சார்ந்தோரை அழைத்துச் செல்ல அனுமதி இல்லை, அப்படி அழைக்க வேண்டுமெனில் அவர்கள் அரசு உதவியுடன் படிக்கும் மாணவர்கள் அல்லது அறிவியல் ஆராய்ச்சிப் பாடநெறிகளைத் தேர்வு செய்திருக்க வேண்டும்.

சர்வதேச மாணவர்களின் குறைவால் பல்கலைக்கழகங்கள் கடுமையான பொருளாதார சவால்களை எதிர்கொள்ளும் நிலை ஏற்பட்டுள்ளது.

சர்வதேச மாணவர்களின் கட்டணங்களிலேயே பல்கலைக்கழகங்கள் பெருமளவிலான வருவாயைப் பெறுகின்றன.

இப்போதைய சரிவு, பல்கலைக்கழகங்களின் பொருளாதார திட்டங்களை மறுசீரமைக்க அழுத்தம் செலுத்துகிறது.

சர்வதேச மாணவர்களை மட்டுப்படுத்த புதிய திட்டங்கள் மே 2024ல் வெளியிடப்பட்டன. இதில் உள்ள முக்கிய அம்சங்கள்:

– சர்வதேச மாணவர்களை ஆட்சேர்ப்பு செய்யும் நிறுவனங்களுக்கான கடுமையான இணக்க தரநிலைகள்

– ஆட்சேர்ப்பு முகவர்களுக்கான கட்டாய தர உத்தரவாத கட்டமைப்புகள்

– மாணவர்களுக்கான அதிகரித்த நிதி பராமரிப்பு தேவைகள்

– தரப்படுத்தப்பட்ட ஆங்கில மொழித் தேர்ச்சி மதிப்பீடுகள்

– தொலைதூர கற்றலுக்கான கட்டுப்பாடுகள், நேருக்கு நேர் கற்பித்தலுக்கு மாறுதல்

இந்த விதிமாற்றங்கள், பிரித்தானியாவின் கல்வி துறையிலும், சர்வதேச மாணவர்களின் விருப்பங்களிலும் பாரிய தாக்கத்தை ஏற்படுத்தும் என்று எதிர்பார்க்கப்படுகிறது.