ஆட்டுமந்தையுடன் அடைக்கப்பட்ட பாஜக மகளிர் அணியினர்! துர்நாற்றம் வீசுவதாக புகார்

பொலிஸாரால் கைது செய்யப்பட்ட பாஜக மகளிரணி நிர்வாகிகளை ஆட்டுமந்தையுடன் அடைக்கப்பட்டதாக புகார் எழுந்துள்ளது.

ஆட்டுமந்தையுடன் அடைப்பு?
சென்னை அண்ணா பல்கலைக் கழக வளாகத்தில் மாணவி ஒருவர் வன்கொடுமைக்கு ஆளான சம்பவத்தை கண்டித்து, பாஜக சார்பில் நேற்று போராட்டம் நடத்தப்போவதாக அறிவிக்கப்பட்ட நிலையில், காவல்துறை அனுமதி வழங்கவில்லை.

இந்நிலையில், பாஜக மகளிரணி சார்பில் மதுரையில் பேரணி நடத்தினர். அப்போது, பேரணியில் கலந்துகொள்ள பாஜக பிரமுகர் குஷ்பு வந்திருந்தார். பின்னர், தடையை மீறி தொடர்ந்து பேரணியில் ஈடுபட முயன்ற குஷ்பு உள்ளிட்ட பாஜகவினர் கைது செய்யப்பட்டனர்.

கைது செய்யப்பட்ட பாஜக மகளிர் அணியினர் மதுரை சிம்மக்கல் பகுதியில் உள்ள ஆயிரம் வீட்டு யாதவ ஆடு வியாபாரிகள் ஆட்டு மகமை கட்டளை திருமண மண்டபத்தில் ஆடுகள் அடைக்கப்பட்ட பகுதியின் அருகே அடைக்கப்பட்டுள்ளனர்.

இந்நிலையில், மேலும் ஏராளமான ஆடுகள் மண்டபத்திற்குள் அடைக்கப்பட்டுள்ளன. சுமார் 200க்கும் மேற்பட்ட ஆடுகள் மண்டபத்தில் அடைக்கப்பட்டுள்ளதால் ஆடுகள் கத்துவதோடு கழிவுகளால் துர்நாற்றம் வீசுகிறது.

இதனால், பாஜக மகளிரணி நிர்வாகிகள் சிரமத்திற்கு உள்ளாகியுள்ளனர். மேலும், கழிவறை வசதிகளும் இல்லை எனக்கூறி பாஜகவினர் குற்றம் சாட்டியுள்ளனர்.

அதுமட்டுமல்லாமல், தங்களை வேறு இடத்திற்கு மாற்ற கோரி கோரிக்கை வைத்துள்ளனர். இந்த விவகாரத்திற்கு பாஜகவினர் கண்டனம் தெரிவித்து வருகின்றனர்.