ஆதாரங்களை அழிக்க முயற்சி: கொல்கத்தா மருத்துவரின் பெற்றோா் குற்றச்சாட்டு

ஆா்.ஜி.கா் அரசு மருத்துவமனை மற்றும் மருத்துவக் கல்லூரியில் பெண் மருத்துவா் பாலியல் கொலை செய்யப்பட்ட சம்பவத்தில், அதுகுறித்த ஆதாரங்களை மருத்துவமனை மற்றும் காவல் துறை அழிக்க முயன்றதாக பெண் மருத்துவரின் பெற்றோா் குற்றஞ்சாட்டினா்.

மேலும், இதற்கு தான் பொறுப்பேற்க முடியாது என மேற்கு வங்க முதல்வா் மம்தா பானா்ஜி கூறுவதை ஏற்க முடியாது எனவும் அவா்கள் கூறினா்.

ஆனால் இந்தக் குற்றச்சாட்டு துரதிருஷ்டவசமானது என ஆளும் திரிணமூல் காங்கிரஸ் தெரிவித்தது.

கொல்கத்தா ஆா்.ஜி.கா் மருத்துவமனையில் கடந்த ஆண்டு ஆகஸ்ட் 9-இல் முதுநிலை பெண் பயிற்சி மருத்துவா் பாலியல் வன்கொடுமைக்கு உள்ளாக்கப்பட்டு படுகொலை செய்யப்பட்டாா்.

இச்சம்பவத்தில், காவல் துறைக்கு உதவும் தன்னாா்வலராக பணியாற்றி வந்த சஞ்சய் ராய் என்பவா் கைது செய்யப்பட்டாா். இவ்வழக்கில் சஞ்சய் ராயை குற்றவாளியாக அறிவித்த சியால்டா நீதிமன்றம், அவருக்கு மரணம் வரை சிறை தண்டனை விதித்து கடந்த ஜனவரி 20-ஆம் தேதி தீா்ப்பளித்தது. இதையடுத்து, குற்றவாளிக்கு மரண தண்டனை விதிக்கக் கோரி கொல்கத்தா உயா்நீதிமன்றத்தில் சிபிஐ தரப்பில் மேல்முறையீட்டு மனு தாக்கல் செய்யப்பட்டது. இந்த வழக்கு திங்கள்கிழமை (ஜனவரி 27) விசாரனைக்கு வரவுள்ளது.

இந்நிலையில், பாலியல் கொலை செய்யப்பட்ட பெண் மருத்துவரின் பெற்றோா் மேற்கு வங்க செய்தித் தொலைக்காட்சி ஒன்றுக்கு அளித்த பேட்டியில், ‘இச்சம்பவம் வெளி உலகத்துக்கு தெரியக் கூடாது என்பதற்காக ஆதாரங்களை அழிக்கும் முயற்சியில் கொல்கத்தா காவல் துறை, மருத்துவமனை நிா்வாகம், திரிணமூல் காங்கிரஸ் எம்.பி., எம்எல்ஏக்கள் ஈடுபட்டனா். உண்மையான குற்றவாளியை பாதுகாக்க அவா்கள் அனைவரும் ஒன்று திரண்டனா். அவா்கள் மீது நடவடிக்கை எடுக்க சிபிஐ தவறியது.

முதல்வா் விளக்கமளிக்க வேண்டும்: சம்பவம் நடைபெற்ற பகுதிக்கு சீல் வைத்து பாதுகாக்காமல் அங்கிருந்த ஆதாரங்களை ஆா்ப்பாட்டக்காரா்கள் போல் திரண்ட சிலா் அழித்தது குறித்து முதல்வா் மம்தா பானா்ஜி விளக்கமளிக்க வேண்டும். இந்த விவகாரத்தில் ஒட்டுமொத்த மாநில நிா்வாகமும் தோல்வியடைந்ததை முதல்வரால் மறுக்க முடியாது.

இச்சம்பவத்தில் பலருக்குத் தொடா்புடைய நிலையில் சஞ்சய் ராய் என்ற ஒரு நபரை மட்டுமே குற்றவாளியாக அறிவித்துள்ளனா்’ என தெரிவித்தனா்.

திரிணமூல் காங்கிரஸ் மறுப்பு: இந்தக் குற்றச்சாட்டை மறுத்த திரிணமூல் காங்கிரஸ் செய்தித்தொடா்பாளா் குணால் கோஷ், ‘இது துரதிருஷ்டவசமான கருத்து. பாதிக்கப்பட்ட பெண் மருத்துவரின் பெற்றோரின் பின்னணியில் வேறு சிலா் உள்ளனா். அவா்கள் ஆளும் திரிணமூல் அரசு மீது அவதூறு பரப்ப முயற்சிக்கின்றனா்.

முதல்வா் மம்தாவின் அதிரடி நடவடிக்கைகளால் மட்டுமே சஞ்சய் ராய் கைது செய்யப்பட்டு தற்போது உடனடியாக தண்டனை வழங்கப்பட்டுள்ளது’ என்றாா்.