உக்ரைனை காப்பாற்ற களமிறங்கும் பிரித்தானியாவும் பிரான்சும்: தயாராகும் புதிய திட்டம்

உக்ரைனை பாதுகாக்கும் வகையில் ஐரோப்பா சார்பாக ஒரு உறுதியளிக்கும் படை ஒன்றை உருவாக்க பிரித்தானியாவும் பிரான்சும் களமிறங்கியுள்ளது.

இந்தப் படையின் நோக்கம்
உக்ரேனிய நகரங்கள், துறைமுகங்கள் மற்றும் முக்கியமான உள்கட்டமைப்புகள் மீது எதிர்காலத்தில் ரஷ்ய தாக்குதல்களைத் தடுக்க இந்த முயற்சி முன்னெடுக்கப்படுகிறது.

மேற்கத்திய நாடுகளின் அதிகாரிகள் கூறுகையில், 30,000 க்கும் குறைவான வீரர்கள் இதில் ஈடுபடுவார்கள் என்றும், வான் மற்றும் கடல்சார் பாதுகாப்பில் கவனம் செலுத்தப்பட வாய்ப்புள்ளது என்றும் தெரிவித்துள்ளனர்.

உக்ரைனின் வான்வெளியை வணிக விமானங்களுக்கு பாதுகாப்பாக மீண்டும் திறப்பதை உறுதி செய்வது இந்தப் படையின் நோக்கங்களில் ஒன்றாகும். மட்டுமின்றி, உக்ரைனின் உணவு மற்றும் தானிய ஏற்றுமதிக்கு முக்கியமான கருங்கடலில் கடல்வழி வர்த்தகத்தின் பாதுகாப்பை உறுதி செய்யவும் இந்தப் படை பயன்படுத்தப்படும்.

கிட்டத்தட்ட மூன்று வருட போரின் போது உக்ரைனின் மின்சாரம் மற்றும் பிற பயன்பாடுகள் ரஷ்யாவால் பலமுறை குண்டுவீச்சுக்கு உள்ளாக்கப்பட்டுள்ளன. போர் முடிவுக்குக் கொண்டுவரப்பட்டால், நாட்டின் மீட்சிக்கு அவர்களின் ஒருமைப்பாட்டைப் பராமரிப்பது மிக முக்கியமானதாகக் கருதப்படுகிறது.

முடிவுக்கு வாய்ப்பில்லை
இந்த நிலையில், எண்ணிக்கையில் ஒப்பீட்டளவில் குறைவாக இருக்கும் ஒரு படைக்கு உக்ரைன் ஆதரவு அளிக்குமா என்பது தெளிவாகத் தெரியவில்லை. ஆனால், அமெரிக்க ஆதரவை உள்ளடக்கிய 100,000-150,000 பலம் கொண்ட ஒரு படையை உருவாக்கவே உக்ரைன் ஜனாதிபதி ஜெலென்ஸ்கி அழைப்பு விடுத்துள்ளார்.

அமெரிக்கா சார்பில் அப்படியான முடிவுக்கு வாய்ப்பில்லை என்றே தெரிவிக்கப்பட்டுள்ளது. இருப்பினும், ஐரோப்பிய நாடுகள் இந்த திட்டத்துடன் முன்னேறும் என்றே கூறப்படுகிறது.

மேலும், அடுத்த வாரம் அமெரிக்கா பயணப்படவிருக்கும் பிரித்தானிய பிரதமர் கெய்ர் ஸ்டார்மர், இந்த விவகாரம் தொடர்பில் ஜனாதிபதி ட்ரம்புடன் விவாதிப்பார் என்றும் தகவல் வெளியாகியுள்ளது.

பிரான்ஸ் ஜனாதிபதி இமானுவல் மேக்ரானும் அடுத்த வாரம் அமெரிக்கா செல்லவிருக்கிறார். இதற்கிடையில், போர் முடிவுக்கு வந்தால், எந்தவொரு நேட்டோ நாடும் உக்ரைனில் படைகளை நிறுத்துவதை ரஷ்யா வெளிப்படையாக ஆட்சேபிப்பதாகக் கூறியுள்ளது.